បើព្រះគង់ជាមួយយើង If God is with us!
- chanvanny71
- Jun 17
- 1 min read
នៅក្នុងជីវិតរបស់យើងម្នាក់ៗយើងតែងតែជួបប្រទះនូវ ទុក្ខព្រួយ ភាពខ្វល់ខ្វាយ ការបាក់ទឹកចិត្ត, គ្មានមនុស្សណាយល់ពីយើង ហើយយើងតែងតែមានអារម្មណ៍ថាអស់កម្លាំងហើយពេលខ្លះក៏មិនចង់ធ្វើអ្វីទាំងអស់គឺគ្មានកំឡាំងក្នុងការធ្វើទាល់តែសោះ ហើយក៏ធ្លាប់គិតថានឹងបោះបង់ចោលគ្រប់យ៉ាង។ប៉ុន្តែនៅពេលដែលយើងសម្លឹងមើលតែបញ្ហា ទុក្ខកង្វល់និងការជាច្រើនដែលយើងគិតថាវាធំហើយហួសកម្លាំងនោះ យើងមើលមិនឃើញពីសេចក្តីអំណរ, កម្លាំង, ការដឹកនាំ ហើយនឹងភាពរីករាយដែលយើងមាននៅក្នុងជីវិតយើងនោះទេ។ នៅពេលដែលយើងក្រោកពីដំណេកមក យើងគិតហើយមើលឃើញមុនគេគឺជាទុក្ខសោក ភាពសៅហ្មង យើងមិនដែលបានសម្លឹងមើលភាពដ៏ស្រស់បំព្រងដែលព្រះបានបង្កើតមកហើយព្រះពរដែលយើងមាននៅក្នុងជីវិតយើងនោះឡើយ។ នៅពេលដែលមនុស្សជាច្រើនមិនមានកន្លែងសម្រាកដូចជាយើង យើងមើលមិនឃើញទេ។នៅពេលដែលមនុស្សជាច្រើនគ្មានពេលសម្រាកគ្រប់គ្រានដូចយើង យើងមើលមិនឃើញទេ។ នៅពេលដែលមនុស្សជាច្រើនមិនអាចក្រោកពីដំណេក ឬអាចក្រោកឡើងពីគ្រែបាននោះយើងមិនដែលគិតដល់ទេ។ទាល់តែថ្ងៃមួយយើងប្រែក្លាយជាមនុស្សម្នាក់នោះដែលមិនមានអ្វីដែលយើងមាននោះទើបយើងដឹងថាយើងធ្លាប់មាន។ប៉ុន្តែអ្វីដែលយើងទាំងអស់គ្នាដែលជាគ្រីស្ទានត្រូវចងចាំហើយថាមនុស្សក្នុងលោកីយគេមិនមាននោះគឺថា យើងមានព្រះ។ មិនមែនមានន័យថាគ្រីស្ទានមិនមានបញ្ហាអ្វីនោះឡើយ មិនមែនមានន័យថាគ្រីស្ទានមិនមានទុក្ខលំបាកក្នុងជីវិតនោះទេ ក៏មិនមែនមានន័យថាគ្រីស្ទានមិនចេះឈឺនោះដែរ ប៉ុន្តែនៅពេលដែលយើងមានបញ្ហាគឺយើងមិនមែនប្រឈមមុខជាមួយនឹងបញ្ហាទាំងនោះតែម្នាក់ឯងនោះឡើយ។យើងមានព្រះមិនថាយើងស្ថិតនៅក្នុងស្ថានភាពណាមួយនោះឡើយ យើងមានព្រះវិញ្ញាណព្រះដែលគង់នៅជាមួយនឹងយើងនៅពេលដែលយើងស្តាប់តាមដំណឹងល្អ ដូចដែលព្រះគម្ពីរចែងក្នុង កិច្ចការ ២:៣៨ ថា “ពេត្រុសឆ្លើយតបថា ចូរអ្នករាល់គ្នាប្រែចិត្តចុះ ហើយទទួលបុណ្យជ្រមុជទឹកទាំងអស់គ្នា ដោយនូវព្រះនាមព្រះយេស៊ូវគ្រីស្ទ ប្រយោជន៍ឲ្យបានរួចពីបាប នោះអ្នករាល់គ្នានឹងទទួលអំណោយទាន ជាព្រះវិញ្ញាណបរិសុទ្ធ “។ ហើយយើងជាមនុស្សដែលមានក្តីសង្ឃឹម ជាមនុស្សដែលមានសេចក្តីជំនឿ (ហេព្រើរ១១:១)។ អញ្ចឹងដោយព្រោះតែយើងបានទទួលអំណោយទានមកពីព្រះដែលទ្រង់គង់នៅជាមួយនឹងយើង តើមានអ្វីខ្លះដែលអាចធ្វើឲ្យយើងឬ អូសទាញយើងចេញពីព្រះបាន?តើទុក្ខកង្វល់របស់យើងនោះវាធំពេកដែលយើងមិនអាចបន្តឬយ៉ាងណា?លោកសាវ័កប៉ុលបានប្រាប់យើងទាំងអស់គ្នានៅក្នុងសេចក្តីសំបុត្រផ្ញើទៅកាន់ពួកគ្រីស្ទាននៅជំនាន់គាត់នឹងយើងទាំងអស់គ្នា ក្នុងរ៉ូម ៨:៣៨-៣៩ “ដ្បិតខ្ញុំជឿជាក់ថា ទោះស្លាប់ ឬរស់ ពួកទេវតា ឬអំណាចអ្វី ការអ្វីនៅជាន់នេះ ឬទៅមុខ ឬឥទ្ធិឫទ្ធិអ្វី ៣៩ ទីមានកំពស់ ទីជំរៅ ឬរបស់អ្វីដែលកើតមកឯទៀតក្តី នោះពុំអាចនឹងពង្រាត់យើង ចេញពីសេចក្តីស្រឡាញ់របស់ព្រះ ដែលនៅក្នុងព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នាទៅ បានឡើយ។” នៅពេលដែលកូនរបស់ព្រះ ពួកអ្នកបម្រើរបស់ព្រះជាម្ចាស់ប្រឈមមុខជាមួយនឹងបញ្ហា ព្រះអង្គតែងតែមានបន្ទូលកំសាន្តចិត្តនិងដាស់តឿនដល់ពួកគាត់ទាំងអស់គ្នាថា “កុំឲ្យភ័យខ្លាចឡើយ គឺទ្រង់តែងគង់ជាមួយគេ។” យើងក៏បានឃើញពីគំរូនេះដែលព្រះបានមានព្រះបន្ទូលដល់ហោរាអេសាយពេលដែលគាត់ប្រឈមមុខនឹងបញ្ហាដែរ ដូចដែលមានចែងនៅក្នុងអេសាយ ៤១:១០ ថា “កុំឲ្យភ័យខ្លាចឡើយ ដ្បិតអញនៅជាមួយនឹងឯង កុំឲ្យស្រយុតចិត្តឲ្យសោះ ពីព្រោះអញជាព្រះនៃឯង អញនឹងចំរើនកំឡាំងដល់ឯង អើ អញនឹងជួយឯង អើ អញនឹងទ្រឯង ដោយដៃស្តាំដ៏សុចរិតរបស់អញ។” ហើយពួកសាវ័កក៏បានបង្រៀនសេចក្តីដូចគ្នានេះជាការដាស់តឿនដល់យើងទាំងអស់គ្នាកុំឲ្យមានការភ័យខ្លាចអ្វីឡើយព្រោះយើងអាចទូលការទាំងអស់ដល់ព្រះ ហើយទ្រង់តែងតែស្តាប់យើងទាំងអស់គ្នា ដូចដែលមានចែងនៅក្នុង ភីលីព ៤:៦-៧ “ កុំឲ្យខ្វល់ខ្វាយអ្វីឡើយ ចូរទូលដល់ព្រះ ឲ្យជ្រាបពីសេចក្តីសំណូមរបស់អ្នករាល់គ្នាក្នុងគ្រប់ការទាំងអស់ ដោយសេចក្តីអធិស្ឋាន និងពាក្យទូលអង្វរ ទាំងពោលពាក្យអរព្រះគុណផង ៧ យ៉ាងនោះ សេចក្តីសុខសាន្តរបស់ព្រះ ដែលហួសលើសពីអស់ទាំងគំនិត និងជួយការពារចិត្ត ហើយនិងគំនិតរបស់អ្នករាល់គ្នា ក្នុងព្រះគ្រីស្ទយេស៊ូវ។” ប៉ុន្តែយើងជាមនុស្ស, យើងតែងតែមានការភ័យខ្លាច ហើយសង្ស័យ នៅពេលដែលយើងសម្លឹងមើលទៅបញ្ហានោះវាធំពេកសម្រាប់យើង,ហើយយើងតែងតែសួរថា តើខ្ញុំត្រូវធ្វើយ៉ាងណា?ចម្លើយនោះគឺ ទូលថ្វាយទាំងអស់ដល់ព្រះ! ការដែលមនុស្សមិនអាចធ្វើបាននោះព្រះទ្រង់ធ្វើបានទាំងអស់! គ្មានការអ្វីដែលព្រះទ្រង់ធ្វើមិនបាននោះឡើយ ដូចដែលទេវតាបានប្រាប់ដល់នាងម៉ារីនិងយើងទាំងអស់គ្នា នៅក្នុងលូកា ១:៣៧ “ ដ្បិតការអ្វីដែលព្រះទ្រង់ធ្វើពុំបាន នោះគ្មានសោះឡើយ។” អ្វីដែលសំខាន់នោះថាតើយើងជឿថាព្រះទ្រង់គង់នៅជាមួយយើងដែរទេ? ប្រសិនបើយើងជឿថាព្រះទ្រង់គង់នៅជាមួយនឹងយើង នោះគ្មានអ្វីណាមួយ ឬអ្នកណាម្នាក់អាចយកឈ្នះលើសេចក្តីសង្រ្គោះនិងជីវិតដែលព្រះបានប្រទានមកឲ្យយើងទាំងអស់គ្នានោះឡើយ ដូចដែលលោកប៉ុលបានប្រាប់ដល់យើងក្រោមការដឹកនាំនៃព្រះវិញ្ញាណថា “ដូច្នេះ យើងនឹងថ្លែងប្រាប់ពីសេចក្តីទាំងនេះថាដូចម្តេច បើសិនជាព្រះកាន់ខាងយើង តើអ្នកណាអាចទាស់នឹងយើងបាន” (រ៉ូម ៨:៣១)។ ដូច្នេះ ហើយប្រសិនយើងជឿថា ព្រះទ្រង់អាចនឹងធ្វើគ្រប់ការទាំងអស់បានដែលត្រូវនឹងព្រះទ័យទ្រង់។ហើយបើយើងជឿថាព្រះទ្រង់កាន់ខាងយើងនោះយើងមិនត្រូវខា្លចអ្វីសោះ។ នោះយើងក៏ត្រូវតែជឿថា យើងអាចឆ្លងកាត់គ្រប់ទាំងបញ្ហាដែលមាននៅក្នុងជីវិតរបស់យើងបានដែរ ព្រោះកម្លាំងដែលព្រះប្រទានឲ្យនោះគឺឲ្យយើងអាចតស៊ូជាមួយនឹងបញ្ហាទាំងនោះបានដូចដែលមានចែងនៅក្នុង ភីលីព ៤:១៣ ថា “ ខ្ញុំអាចនឹងធ្វើគ្រប់ទាំងអស់បាន ដោយសារព្រះគ្រីស្ទដែលទ្រង់ចំរើនកំឡាំងដល់ខ្ញុំ” ។ សូមព្រះប្រទានពរ!
